Banka Qendrore e Zvicrës e lë të pandryshuar normën e interesit

Inflacioni mesatar vjetor parashikohet në 2.1% për vitin 2023, 1.9% për vitin 2024 dhe 1.6% për vitin 2025

Banka Kombëtare e Zvicrës (SNB) tha se po përfundonte ciklin e saj të shtrëngimit të normave të interesit pas një ngadalësimi të qartë të inflacionit.

Me rritjen e inflacionit më ngadalë se kufiri prej 2% i Bankës qendrore (ishte 1.4% në nëntor 2023), SNB e la normën bazë të interesit në 1.75% për një takim të dytë radhazi. Ndërsa SNB është ende e gatshme të ndërhyjë në tregjet e monedhës duke blerë dhe shitur franga zvicerane, Jordan tha se kjo mund të shkojë në të dy drejtimet dhe SNB nuk po fokusohet më në shitjen e frangave, transmeton albinfo.ch.

Edhe pse SNB nuk parashikon që inflacioni të rritet mbi tavanin e tij prej 2% para të paktën 2026-ës, presidenti i SNB, Thomas Jordan, e bëri të qartë se për momentin rritjet janë jashtë tavolinës. Në vend të kësaj, ulja e normës mund të jetë në tryezë në takimet e ardhshme.

Me ngadalësimin e rritjes ekonomike dhe me inflacion të ulët, mund të ketë hapësirë për të përshtatur politikën monetare. Disa analistë parashikojnë një ulje të normës që në mars 2024. Por Jordon paralajmëroi se të gjitha parashikimet janë të rrethuara nga pasiguri e lartë për momentin.

Inflacioni rezultoi në 1.4% në muajin nëntor, disi më i ulët se në muajt e mëparshëm. Rënia i atribuohet kryesisht uljes së inflacionit të mallrave dhe shërbimeve turistike. Megjithatë, inflacioni ka gjasa të rritet sërish në muajt në vijim për shkak të rritjes së çmimeve të energjisë elektrike dhe qirave, si dhe rritjes së TVSH-së.

Inflacioni mesatar vjetor parashikohet në 2.1% për vitin 2023, 1.9% për vitin 2024 dhe 1.6% për vitin 2025. Parashikimi bazohet në supozimin se norma e politikës së SNB-së është 1.75% në të gjithë horizontin e parashikimit, shkruan SNB.

Për vitin 2024, SNB aktualisht pret rritje ekonomike midis 0.5% dhe 1%. Në këtë mjedis, papunësia ka të ngjarë të vazhdojë të rritet gradualisht dhe shfrytëzimi i kapaciteteve prodhuese duhet të bjerë më tej.

Parashikimi për Zvicrën, ashtu si për ekonominë globale, është subjekt i pasigurisë së lartë. Rreziku kryesor është një ngadalësim më i theksuar ekonomik jashtë vendit, tha Banka qendrore.

---