Baronesha Ashton në Kosovë, më 28 dhe 29 mars

Kjo vizitë e saj vjen menjëherë pas raundit të dytë të dialogut ndërmjet Kosovës dhe Serbisë në Bruksel

Përfaqësuesja e lartë e BE-së për Politikë të Jashtme dhe Siguri, baronesha Catherine Ashton do ta vizitojë Kosovën më 28 dhe 29 mars.

Kjo vizitë e saj vjen menjëherë pas raundit të dytë të dialogut ndërmjet Kosovës dhe Serbisë në Bruksel, që është paraparë të mbahet më 24 dhe 25 mars.

Shefja e ekipit kosovar në dialogun me Serbinë, zëvendëskryeministrja Edita Tahiri ka thënë se gjatë vizitës së kryediplomates evropiane në Kosovë do të kërkohet të bëhet e qartë agjenda e bisedimeve me Serbinë dhe se çfarë fiton Kosova, duke qenë bashkëpunuese.

Raundi i parë i dialogut Kosovë Serbi, me ndërmjetësimin e BE-së në Bruksel, që u mbajt më 8 dhe 9 mars ka përfunduar pa ndonjë rezultat konkret, në takimin e dytë sërish do të bisedohet për disa çështje teknike.