Basha, raport para komisionit të sigurisë për akuzat e Martyt

Basha, në vitin 2003, me personelin e Tribunalit për Krimet e Luftës ka grumbulluar të dhëna në Shqipëri për dosjet me akuza kundër UÇK-së

Ministri i Brendshëm, Lulzim Basha do të raportojë në Komisionin e Sigurisë në Kuvend në lidhje me raportin e Dik Martit dhe ato që ai di lidhur me këtë çështje, raportojnë mediet nga Tirana.

Basha, në vitin 2003, me personelin e Tribunalit për Krimet e Luftës ka grumbulluar të dhëna në Shqipëri për dosjet me akuza kundër UÇK-së.

Ministri i Brendshëm, Lulzim Basha do të raportojë në Komisionin e Sigurisë në Kuvend në lidhje me raportin e Dik Martit dhe ato që ai di lidhur me këtë çështje, raportojnë mediet nga Tirana.

Lulzim Basha, në pranverë të vitit 2003, ka punuar së bashku me personelin e Tribunalin për Krimet e Luftës duke grumbulluar të dhëna dhe fakte në Shqipëri për dosjet me akuza kundër UÇK-së. Këto dosje kanë të bëjnë kryesisht me rrëmbimin e shtetasve serbë dhe jo serbë pas ndërhyrjes së NATO-s në Kosovë si dhe për çështjen e shumëpërfolur të trafikut të organeve nga Shqipëria.

Përveç Bashës, në Komisionin e Sigurisë do të raportojnë edhe kreu i Shërbimit Informativ Shtetëror, Bahri Shaqiri si dhe ministri i Jashtëm, Edmond Haxhinasto. “Unë mendoj se është detyrë e këtij komisioni që të thërrasim në një seancë dëgjimore me dyer të mbyllura drejtorin e SHISH, Ministrin e Brendshëm Lulzim Basha dhe Ministrin e Punëve të Jashtme për të na informuar mbi atë që shteti ynë ka dijeni dhe hapat konkretë që janë marrë”, – tha nënkryetari i këtij komisioni Ilir Gjoni. Deputeti i PS e cilësoi njëherazi raportin e Dik Martit si një fushatë antishqiptare.

Një arsye më shumë për thirrjen e ministrit Basha në raport ka qenë një deklaratë e HRW. Hetuesi i Human Rights Watch, Fred Abrahams lidhur me rastin është shprehur: “Ministri Basha e di nga përvoja e tij personale se ka prova të besueshme për këto transferime ndërkufitare. Ai ka punuar për Gjykatën dhe Departamentin e Drejtësisë pranë UNMIK-ut pas luftës, dhe hetoi personalisht informacionet për këto vendburgosje në veri të Shqipërisë”.

Më përpara ishte antropologu peruan, Jose Pablo Baraybar, që foli mbi rolin e z. Basha në këtë hetim si përkthyes në udhëtimin klandestin të z. Baraybar në Veri të Shqipërisë për hetimin e dosjes së krimeve të supozuara, në qendër të të cilave ishte “shtëpia e verdhë”.