Bayern do ta marrë Shaqirin “në minutën e fundit”

Klubi më i madh gjerman, FC Bayern ka intensifikuar përpjekjet për të marrë në gjirin e tij Xherdan Shaqirin

Nesër (31 janar) mbyllet “pazari” i futbollistëve. Por, edhe pse kanë mbetur pak orë deri në përfundim, spekulimet për Shaqirin vazhdojnë të jenë po kaq të gjalla sikundër kanë qenë tash sa muaj.

Jo më larg se dje, e diele, menaxheri i xhuxhit magjik, njëherësh vëllai i tij, Erdini, kishte deklaruar për mediet zvicerane se Xherdani po mbetej në FC Basel. Vetëm ndonjë befasi e jashtëzakonshme (ndonjë ofertë fantastike nga Barcelona, Reali…) mund të ndryshonin gjendjen e gjërave, thoshte ai.

Por ndërkohë, gjatë orëve të natës gjendja ka ndryshuar. Klubi më i madh gjerman, FC Bayern ka intensifikuar përpjekjet për të marrë në gjirin e tij Xherdan Shaqirin.

Kështu shkruan Bild-i gjerman dhe Blick-u zviceran. Madje, sipas tyre, janë caktuar terminet për bisedimet e para në mes të dy top skuadrave. Sipas këtyre gazetave, më së voni në sezonin e ardhshëm Shaqiri mund të luajë për kolosin gjerman.