BBC: Salca “italiane” përmban domate kineze të punës së detyruar

Salca e domates “italiane” të shitura nga disa supermarkete në Britaninë e Madhe duket se përmban domate të rritura dhe të vjela në Kinë, duke përdorur punë të detyruar, sipas BBC.

“Një total i 17 produkteve, shumica prej tyre e markave të shitura me pakicë në Britaninë e Madhe dhe gjermane ka të ngjarë të përmbajnë domate kineze”, sipas një testi të kryer nga Shërbimi Botëror.

Shumica e domateve kineze vijnë nga rajoni Xinjiang, ku prodhimi i tyre lidhet me punën e detyruar nga ujgurët dhe pakicat e tjera kryesisht myslimane.

OKB-ja akuzon shtetin kinez – i cili i sheh këto pakica si një rrezik sigurie – për torturë dhe abuzim.

Kina ka hedhur poshtë pretendimet se i detyron njerëzit të punojnë në industrinë e domates – duke shtuar se të drejtat e punëtorëve mbrohen me ligj. Sipas saj, raporti i OKB-së bazohet në “dezinformim dhe gënjeshtra”.

Të gjitha supermarketet, produktet e të cilëve ne testuam, kundërshtojnë gjetjet tona.

Kina rrit rreth një të tretën e domateve në botë. Rajoni veri-perëndimor i Xinjiang ka klimë të përsosur për rritjen e frutave.

Ai është gjithashtu vendi ku Kina filloi një program ndalimesh masive më 2017.

Grupet e të drejtave të njeriut pretendojnë se më shumë se një milion ujgurë janë ndaluar në qindra objekte, të cilat Kina i ka quajtur “kampe riedukimi”.