BE-ja dënon dhunën nga regjimi në Venezuelë

Bashkimi Europian dënoi sot veprimet e dhunshme dhe përdorimin e forcës nga grupet e armatosura të regjimit në pushtet në Venezuelë për të penguar hyrjen e ndihmave humanitare në vend.

“Refuzimi i regjimit për të pranuar urgjencën humanitare po sjell një përshkallëzim të tensioneve”, kritikoi shefja europiane e diplomacisë, Federica Mogherini, në një deklaratë në emër të 28 shteteve anëtare të BE-së, shkruan Alsatm, përcjell albinfo.ch.

“Ne kundërshtojmë përdorimin e grupeve të armatosura të parregullta për të frikësuar civilët dhe ligjvënësit që janë mobilizuar për të ndarë ndihma”, insistoi ajo.

“Informacione të frikshme flasin për trazira, veprime të dhunshme dhe për një numër në rritje të viktimave, në veçanti në zonat kufitare dhe mes komunitetit autokton pemon. Ne u kërkojmë menjëherë forcave të rendit dhe organeve të sigurisë të tregojnë përmbajtje, të evitojnë përdorimin e forcës dhe të mundësojnë hyrjen e ndihmave”, përfundon ajo.