BE kërkon konsensus për mbajtjen e zgjedhjeve serbe në Kosovë

BE-ja është shprehur e gatshme të lehtësojë dhe të ofrojë ide në përputhje me praktikat evropiane, për votimin e qytetarëve serbë të Kosovës në zgjedhjet e përgjithshme në Serbi.

Zëdhënësi i Bashkimit Evropian, Peter Stano, ka bërë të ditur se BE-ja kërkon nga Kosova dhe Serbia negociata për të gjetur një konsensus të nevojshëm për votimin e serbëve të Kosovës në zgjedhjet e Serbisë më tre prill, përcjell Albinfo.ch.

Stano, mes tjerash, ka potencuar se BE-ja është e gatshme të lehtësojë dhe të ofrojë ide në përputhje me praktikat evropiane për votimin e qytetarëve serbë të Kosovës në zgjedhjet e përgjithshme në Serbi.

“U takon të dyja palëve (Kosovë/Serbi) të përfshihen në negociata dhe të gjejnë një konsensus të nevojshëm. BE-ja është e gatshme të lehtësojë dhe të ofrojë ide në përputhje me praktikat evropiane, por në fund të fundit, përgjegjësia për të gjetur një marrëveshje u takon të dyja palëve. Përfaqësuesi special i BE-së, Lajçak, ua bëri këtë gjë shumë qartë homologëve të tij gjatë vizitës së tij të fundit në Prishtinë”, ka thënë Stano në një përgjigje me shkrim për KosovaPress.

---