Qeveria premton 500 mijë euro shpërblim për Kosovën në rast fitoreje ndaj Sllovakisë

Kryeministri Albin Kurti ka bërë të ditur se Qeveria do ta shpërblejë Kombëtaren e Kosovës me 500 mijë euro në rast fitoreje ndaj Sllovakisë, ndërsa për kualifikim në Kupën e Botës janë premtuar edhe 1 milion euro shtesë.

Kombëtarja e Kosovës në futboll do të shpërblehet me 500 mijë euro nga Qeveria e Kosovës, nëse sonte arrin fitore ndaj Sllovakisë në ndeshjen e plejofit kualifikues për Kupën e Botës 2026, përcjell albinfo.ch.

Ky zotim ishte bërë nga kryeministri Albin Kurti gjatë një mbledhjeje të Qeverisë, ku ai kishte theksuar se shteti do të mbështesë financiarisht “Dardanët” për suksesin e arritur deri më tani dhe për objektivin historik të kualifikimit.

“Një lajm të mirë e kemi për përfaqësuesen tonë në futboll, për djemtë me të cilët jemi krenarë në çdo ndeshje. Për suksesin historik në këtë fushatë të kualifikimeve në Kupën e Botës 2026, kalimin në fazën e play-off-it, me vendim të qeverisë, sot do të ndajmë 250 mijë euro shpërblim”, kishte deklaruar Kurti.

Ai kishte bërë të ditur se shpërblimet do të rriten në varësi të rezultateve të ardhshme.

“Në rast fitores ndaj Sllovakisë, zotohemi për shpërblim në vlerë prej 500 mijë eurove. Ndërsa në rast të kualifikimit në Kupën e Botës, zotohemi edhe për 1 milion euro të tjera shpërblim. Përpara Kosovë. Gjithmonë me ty!”, kishte thënë Kurti.

Ndërkohë, Qeveria tashmë kishte ndarë 250 mijë euro për Kombëtaren e Kosovës pas arritjes historike të kualifikimit në fazën e “play-off”-it.

Kosova sonte do të përballet me Sllovakinë në Bratisllavë, ndërsa në rast të fitores, ndeshja vendimtare për kualifikim do të zhvillohet në Prishtinë, ndaj fituesit të përballjes Turqi – Rumani./Albinfo.ch

---