BE synon politika më të rrepta të azilit dhe tërheqjen e punëtorëve të kualifikuar

Komisioni Evropian ka njoftuar se do të ndjekë një politikë të rreptë migracioni për pesë vitet e ardhshme, ndërkohë që synon të tërheqë punëtorë të kualifikuar drejt Bashkimit Evropian.

“Për të mbrojtur ata që kanë nevojë reale për mbrojtje dhe për të qëndruar konkurrues në garën globale për talente, duhet të kontrollojmë në mënyrë efektive kufijtë tanë,” tha Komisioneri i BE-së për Migracionin, Magnus Brunner. Politikania austriak shtoi se keqpërdorimi i sistemit të azilit minon besimin e publikut, transmeton albinfo.ch.

Objektivat e strategjisë 2026–2030

Strategjia e Komisionit Evropian për vitet 2026–2030 ka tre objektiva kryesore:

Parandalimi i migracionit të paligjshëm dhe i aktiviteteve të trafikantëve të njerëzve.

Mbrojtja e njerëzve nga lufta dhe përndjekja, pa lejuar keqpërdorimin e sistemit të azilit.

Tërheqja e punëtorëve të kualifikuar në BE.

Për të arritur këto qëllime, Komisioni ka përcaktuar disa prioritete kryesore.

“Qendra multifunksionale” përgjatë rrugëve të migracionit

Autoritetet e Brukselit planifikojnë të forcojnë bashkëpunimin me vendet jashtë BE-së. Sipas raportit, pritet të krijohen “qendra multifunksionale” përgjatë rrugëve të migracionit me mbështetjen e BE-së, megjithëse detajet e sakta ende nuk janë bërë publike.

Bashkëpunime të diskutueshme me vendet e origjinës

Pavarësisht kritikave nga aktivistët e të drejtave të njeriut, BE ka ofruar kohët e fundit mbështetje financiare Egjiptit për të frenuar migracionin e padëshiruar, duke ndihmuar këtë vend të mbajë refugjatët. Sipas OKB-së, Egjipti pranon aktualisht rreth një milion refugjatë nga vendet në krizë, disa prej të cilëve tentojnë të arrijnë BE-në përmes Mesdheut.

Gjithashtu ekzistojnë marrëveshje bashkëpunimi të diskutueshme me Libi. Në të njëjtën kohë, Komisioni Evropian synon të ushtrojë presion mbi vendet e treta për të marrë prapa azilkërkuesit e refuzuar.

Strategjia gjithashtu thekson se deportimet “të shpejta, efektive dhe me dinjitet” janë të domosdoshme për besueshmërinë e sistemit të azilit. Në këtë drejtim, Komisioni do të mbështetet edhe në politikën e vizave, duke e pezulluar lehtësimin e vizave për vendet që nuk bashkëpunojnë mjaftueshëm gjatë intervistave të migracionit.

Strategjia për mungesën e punëtorëve të kualifikuar

Përveç zbatimit strikt të sistemit të azilit, strategjia migratore synon të adresojë mungesën e fuqisë punëtore në disa sektorë kyç. “Gjatë pesë viteve të ardhshme, hendekët e aftësive dhe mungesat e punës do të përkeqësohen në shumë industri kyçe,” thuhet në raport.

Për këtë arsye, BE synon të zgjasë partneritetet me vendet e treta dhe të njohë shpejt kualifikimet e punëtorëve të huaj. Shtetasit e vendeve të treta dhe punëdhënësit do të marrin mbështetje në procesin e aplikimit për vizë.

---