Bebe Rexha arrin në Tiranë, sonte koncert para publikut shqiptar

Artistja 27 vjeçare me emrin e vërtetë Bleta Rexha do të performojë në një koncert në sheshin “Nënë Tereza” në Tiranë sonte në mbrëmje në orën 18:00

Bebe Rexha ka mbërritur dje në Tiranë. Këngëtarja shqiptare me famë botërore është pritur në aeroport edhe nga dhjetëra fansa të cilët kanë pasur mundësi që të bëjnë foto me të.

Artistja 27 vjeçare, do të performojë në një koncert në sheshin “Nënë Tereza” në Tiranë sonte në mbrëmje në orën 18:00.

Të ftuar në koncert do të jenë edhe legjenda britanike DJ Fatboy Slim dhe Honnee. DJ britanik Fatboy Slim, pritet të elektrizojë gjithashtu publikun. Ai është ndër të paktët DJ në botë i vlerësuar me 10 Çmime MTV dhe dy Çmime Brit Awards, dhe shquhet për performanca novatore dhe miksime të pakrahasueshme në skenë.

Bebe Rexha lindi në Nju Jork nën emrin Bleta Rexha në vitin 1989 nga dy prindër shqiptarë. Ajo nisi të këndonte në moshën 4-vjeçare, ndërsa krahas këngës ushqeu pasionin për disa instrumente muzikore. Njihet edhe si tekst shkruese për yjet e muzikës botërore.

Rexha është e njohur për hitet me të cilat ka fituar zemrat e adoleshentëve dhe të rinjve në mbarë botën, ndërsa nuk janë të pakta edhe bashkëpunimet me emra të njohur të muzikës, si David Guetta, Pit Bull, Nicky Minaj etj.

Pas Dua Lipës, Bebe Rexha është ylli tjetër shqiptar më famë botërore që brenda pak muajsh mban koncert para publikut shqiptar.