Berna sygjeron banorët të mos i vrasin ujqërit

Berna vjen me një mënyrë më 'humane' për të ndaluar ujqërit të sulmojnë bagëtinë

Ujqërit që enden nëpër fshatrat zvicerane kanë frikësuar fermerët dhe banorët e tjerë të komuniteteve rurale, përcjell albinfo.ch.

Duke qenë se ata gjymtojnë kafshët dhe nuk kanë frikë as nga njerëzit, mënyra e zakonshme e sjelljes me grabitqarët është vrasja e tyre.

Megjithatë, qeveria kantonale e Bernës tani po propozon që t’i lërë ujqërit të jetojnë, por t’i bëjnë ata më të padëmshëm duke i kapur dhe sterilizuar.

“Sterilizimi është një procedurë e shkurtër dhe e thjeshtë që nuk duhet të prishë organizimin social të kafshëve dhe tufave të tyre”, thanë autoritetet të martën.

“Numri i ujqërve të rinj do të reduktohej dhe tufat do të mund të menaxhoheshin më mirë pa pasur nevojë për të qëlluar,” theksuan ata.

Megjithatë, kundërshtarët argumentojnë se sterilizimi nuk është “një mjet adekuat për t’iu përgjigjur rreziqeve të menjëhershme”. Për më tepër, kjo masë do të sillte kosto shtesë që do të ishin dukshëm më të larta se të shtënat.

Procedura e konsultimit për këtë çështje do të përfundojë më 11 mars.

---