Betohen edhe dy kryetarë në Mitrovicë

Ilir Peci betohet si kryetar i ri i Zveçanit

Kryetari i ri  i Zubin Potokut, Izmir Zeqiri, dhe ai i Zveçanit, Ilir Peci kanë dhënë betimin e tyre.

Kryetari i ri i Zubin Potokut, Izmir Zeqiri tha se detyrën e tij do ta kryej me përkushtim dhe se do të punojë për të gjithë qytetarët pa dallim, shkruan Gazeta Online Reporteri.net.

“Uroj që të jemi bashkë në punët dhe përgjegjësit tona, të jemi sa më të fokusuar që të zbatojmë ligjin e Republikës së Kosovës në tërë territorin e komunës së Zubin Potokut. Faleminderit për besimin. Atë do të ua kthejmë me punë deri në fund”, tha ndër të tjera ai.

Të premtën e kaluar detyrën e mori edhe kryetari i Mitrovicës së Veriut, Erden Atiq.

Ai betimin e bëri në ndërtesën e komunës së Mitrovicës së Veriut.

Komunat në veri mbetën pa kryetarë nga nëntori i vitit të kaluar, kur përfaqësuesit serbë në atë zonë dhanë dorëheqje nga vendet e tyre të punës, për shkak të mospajtimit me një vendim të Qeverisë së Kosovës për riregjistrimin e makinave me targa ilegale serbe.

---