Biden: Zelensky nuk donte t’i dëgjonte paralajmërimet tona për pushtimin

Presidenti i SHBA-së, Joe Biden, deklaroi se homologu i tij ukrainas, Volodymyr Zelensky, nuk donte t’i dëgjonte paralajmërimet tona përpara fillimit të pushtimit rus, në shkurt.

”E di që shumë njerëz menduan se po e ekzagjeroja”, tha Biden në një pritje për mbledhje  fondesh, duke iu referuar paralajmërimit të tij për mundësinë e një sulmi rus.

”Por, e dija që kishim informacion për të mbështetur këtë vlerësim të situatës”, shtoi ai para gazetarëve, përcjell Albinfo.ch.

”Presidenti rus, Vladimir Putin, do ta kalonte kufirin. Nuk kishte asnjë dyshim për këtë dhe Zelensky, si shumë njerëz të tjerë, nuk donte ta dëgjonte. Unë e kuptoj pse ata nuk donin ta dëgjonin atë, por ai (Putin) hyri”, theksoi Biden.

SHBA paralajmëroi për përgatitjet ruse për një pushtim të Ukrainës, shumë kohë përpara se presidenti Putin të shpallte më 24 shkurt nisjen e operacionit special kundër vendit, transmeton Afp.

Paralajmërimet kishin shkaktuar mosbesim dhe madje kritika të mbuluara nga Zelensky dhe disa nga aleatët evropianë të Uashingtonit, të cilët në atë kohë mendonin se Shtetet e Bashkuara të Amerikës po tregoheshin shumë të alarmuara.