Bisedimet Kosovë-Serbi mund të ndërpriten në vjeshtë

Sipas medieve kosovare bisedimet mund të pengohen edhe nga zhvillime të brendshme politike në të dyja vendet

Për shkak të zgjedhjeve parlamentare është e mundur që të procesi i filluar i bisedimeve ndërmjet Kosovës dhe Serbisë të ndërpritet në vjeshtë. Ndërsa, sipas medieve kosovare, bisedimet mund të pengohen edhe nga zhvillime të tjera të brendshme politike në të dyja vendet, pavarësisht dakordimit të palëve për dy takime brenda një muaji në Bruksel.

Dy shefat e delegacioneve – Edita Tahiri dhe Borislav Stefanoviq, thanë dje se gjatë takimit të parë në Bruksel ka pasur përparime

Përderisa partia më e madhe opozitare, LDK-ja, e ka vlerësuar si veprim të papërgjegjshëm të Qeverisë, që pa miratimin e Kuvendit, ka hyrë në bisedime dhe është rezervuar nga komentet e mëtutjeshme, dy partitë tjera opozitare – AAK dhe Vetëvendosje i bëjnë thirrje Qeverisë të ndërpresë dialogun e filluar me Serbinë.

Deputeti i Vetëvendosjes, Visar Ymeri, thotë se negociatat me Serbinë duhet të ndërpriten, pasi që ato, sipas tij, janë të dëmshme dhe nuk mund t’i sjellin asnjë të mirë Kosovës.

Deputeti dhe sekretari i përgjithshëm i AAK-së, Burim Ramadani, thotë se procesi duhet të ndërpritet dhe të përgatitet më mirë, pasi vlerëson se Kosova ka hyrë e papërgatitur në bisedime.

Për bisedimet me Serbinë, Qeveria e Kosovës nuk arriti të sigurojë konsensusin me opozitën në Kuvend. Rezoluta e miratuar në mbështetje të këtyre bisedimeve mori vetëm votat e partive në pushtet.

Ky fat besohet se do të mund t’i përcjellë edhe marrëveshjet eventuale që pala kosovare do t’i arrijë me Serbinë gjatë bisedimeve, sidomos ato që kërkojnë ratifikimin në Kuvend.