Bislimi: Njohja e targave nga Serbia nuk është konstruktivitet, por maskim

Besnik Bislimi

Zëvendëskryeministri i parë, Besnik Bislimi, ka reaguar pas njohjes së targave të Kosovës nga ana e Serbisë. Ai thotë se “është dashur të kalojnë 18 muaj me tensione e barrikada nga ana e Serbisë, rezistencë dhe insistim në nivel teknik që stikersat të jenë zgjidhje permanente, si dhe tërheqje nga institucionet në nëntor të vitit të kaluar, për të ardhur në përfundimin që është i njëjtë me propozimin fillestar të Kosovës”.

Bislimi shton se ky veprim nuk është konstruktivitet nga Serbia, por maskim.

“Gjithashtu duhet të theksojmë dhe të rikujtojmë se ky nuk është konstruktivitet nga ana e Serbisë, por është vetëm maskim që ata duan ta kamuflojnë pas dështimit në Banjskë dhe dështimit të narrativës së tyre të ushqyer për kaq shumë kohë në Bruksel”, shkroi kryenegociatori.

Nga 1 janari të gjitha automjetet me targa RKS do të mund të qarkullojnë nëpër Serbi pa stikersa.