Kurti me presidentin francez në Paris, kërkon mbështetje për integrimin evropian të Kosovës

Kryeministri i Kosovës, Albin Kurti, ka qëndruar sot në Paris për vizitë zyrtare dhe takim me drekë pune me Presidentin e Francës, Emmanuel Macron.

Macron e uroi edhe njëherë Kurtin për rizgjedhjen në krye të Qeverisë së Republikës së Kosovës teksa Kurti shprehu falënderimin për kontributin e vazhdueshëm të Francës ndaj Kosovës.

Në takim morën pjesë edhe Ministri Francez i Deleguar për Evropën, Benjamin Haddad, si dhe Ambasadori i Republikës së Kosovës në Francë, Mehdi Halimi, e Konsulli i Përgjithshëm i Republikës së Kosovës në Strasburg, Lulzim Hiseni, ndërsa u theksua roli pozitiv i vazhdueshëm i NATO-s në Kosovë, përkatësisht i KFOR-it, si dhe i misioneve të Bashkimit Evropian.

Gjatë takimit u diskutua për integrimet dhe sigurinë në Evropë ndërsa Kurti theksoi se Kosova mbetet e harmonizuar plotësisht me politikën e jashtme dhe të sigurisë së BE-së.

Kryeministri i Kosovës kërkoi mbështetjen e Francës për integrimin evropian të Kosovës dhe për anëtarësimin në organizata ndërkombëtare, transmeton albinfo.ch.

Tutje ai foli për sigurinë e Kosovës që para së gjithash është siguri e kufijve të saj, pastaj për ngritjen e kapaciteteve vendore mbrojtëse që po bëhet, raportet me fqinjin verior Serbinë ndërlidhur me procesin e dialogut në Bruksel dhe zbatimin e marrëveshjes për normalizim të plotë, pastaj për bashkëveprimin me aleatët veri-atlantikë dhe për sigurinë rajonale në Ballkan.