Blick për kalimin e Xhakës te Sunderlandi: Një “kryevepër” në Premier League

(KEYSTONE/DPA/Henning Kaiser)

Granit Xhaka mund të ketë ndërmarrë një aventurë të re në Premier League, dhe kjo mund të shndërrohet në një kryevepër. Kështu ka shkruar Tobias Wedermann, redaktori i futbollit në gazetën e madhe zvicerane “Blick”, pas kalimit të mesfushorit shqiptar nga Bayer Leverkuseni te Sunderlandi, transmeton albinfo.ch.

Sunderlandi ka arritur të kthehet në Premier League dhe tani ka një mision të madh: të sigurojë mbijetesën në elitën e futbollit anglez. Granit Xhaka, kapiteni i kombëtares zvicerane, do të udhëheqë këtë sfidë të vështirë.

“Jo Arabia Saudite, jo Turqia – Granit Xhaka zgjodhi atë që mund të jetë aventura e tij e fundit e madhe në skenën më të madhe të futbollit. Në vend që të zhduket nga radari i futbollit për një pagë të madhe, ai po shkon në Premier League. Liga më e mirë dhe më e fortë në botë. Një vend ku kapiteni i Zvicrës nuk është vlerësuar gjithmonë gjatë kohës së tij në Arsenal dhe ku ndonjëherë është trajtuar edhe padrejtësisht,” ka shkruar Wedermann në një koment të tij në gazetën “Blick”.

Sipas ëedermann, Xhaka kthehet në Premier League me një qëllim të qartë: t’i tregojë të gjithëve se çfarë mund të bëjë. “Kampioni i Leverkusenit, Xhaka, ka zgjedhur të hyjë në betejën e vështirë për të shmangur rënien nga kategoria. Heroik, i guximshëm, me premisat e një filmi hollivudian. Qëndrimi në ligë është misioni i vetëm dhe më i madh që Sunderlandi mund ta shpallë. Me përvojën dhe mentalitetin e tij, Xhaka pritet të udhëheqë këtë detyrë ‘herkuliane’. Nëse ia del me sukses, Sunderlandi do të jetë kryevepra e tij e radhës”, ka thënë Wedermann.

Kjo lëvizje e Xhakës mund të përfaqësojë kulmin e karrierës së tij, dhe një mundësi për t’u afirmuar edhe më shumë në Premier League, pas një periudhe të suksesshme te Bayer Leverkuseni, transmeton albinfo.ch.