Boksieri shqiptar, gala për ndihmë të sëmurëve nga kanceri

Mustafe Kicaj e quan sukses faktin që pas të gjitha shpenzimeve të mbrëmje, organizatës “Krebsliga” ka mundur t`ia ofrojë 10.100 franga

Ditë më parë në qytetin e Winterthurit, kantoni Cyrih është organizuar një mbrëmje humanitare spektakli me thai boks dhe me muzikë. Organizator i këtij eventi ka qenë kampioni i trefishtë boteror i kategorisë së vtêt në thai box, Mustafë Kicaj. Mbrëmja ka mbajtur titullin “Art of Fighters” dhe në të kanë marrë pjesë disa boksierë profesionistë, (një pjesë e mirë e të cilëve, shqiptarë) që i kanë kryqëzuar dorezat për një qëllim himanitar: për të ndihmuar organizatën e të sëmurëve nga kanceri, “Krebsliga”.

Organizatori, Mustafë Kicaj shprehet mjaft i kënaqur me mbrëmjen,. “Salla ishte e mbushur përplot dhe atmosfera ka qenë e pashoqe”, thotë kampioni i trefishtë botëror dhe themeluesi i qendrës për thaibox “Musti Gym”. Ai e quan sukses faktin që pas të gjitha shpenzimeve të mbrëmje, organizatës “Krebsliga” ka mundur t`ia ofrojë 10.100 franga. Me këtë shumë ai e ka plotësuar synimin e tij për të siguruar më shumë se 10 mijë franga. Kështu, “Musti” së paku nuk detyrohet të japë para nga xhepi i vet.

“Dëshiroj t`i falënderoj të gjithë që e kanë mundësuar mbledhje e kësaj shume. Jam shumë i impresionuar”, shton Kica për “Winterthurer Zeitung”.

Sapo ka përfunduar spektaklin e parë të suksesshëm, thai-boksieri shqiptar tashmë mendon për vazhdimin. “Startimi doli i suksesshëm, tash vetëm më mirë mund të bëhet”, thotë ai me optimizëm.