Borrell takon të hënën Ministrat e Jashtëm të vendeve të Ballkanit Perëndimor

Kryediplomati evropian, Josep Borrell do të udhëheqë takimin e ministrave të jashtëm të Bashkimit Evropian të hënën në Bruksel.

Pjesë e takimit do të jenë edhe kryediplomatët e vendeve të Ballkanit.

Ministrat e Punëve të Jashtme të BE-së do të diskutojnë agresionin rus kundër Ukrainës dhe zhvillimet e fundit në lidhje me Armeninë dhe Azerbajxhanin, shkruan RTK.

Këshilli më pas do të shkëmbejë pikëpamjet mbi situatën në Izrael dhe rajon dhe dimensionin e politikës së jashtme të sigurisë ekonomike. E pas takimit të Këshillit të Punëve të Jashtme më 13 nëntor, ministrat e BE-së do të marrin pjesë në takimin ministror BE-Ballkani Perëndimor së bashku me gjashtë ministrat e jashtëm nga Shqipëria, Bosnjë e Hercegovina, Kosova, Mal i Zi, Maqedonia e Veriut dhe Serbia, përcjell albinfo.ch.