Bosnja rrezikon fondet e BE-së

Për shkak të grindjeve politike, Bosnja mund të mbetet pa fondet e Bashkimit Evropian

Bashkimi Evropian ka paralajmëruar Bosnjën se mund të humbasë 96 milionë euro fonde të BE-së, që janë pjesë e Instrumentit të Para Aderimit (IPA) për shkak të grindjeve politike, raporton Radio Evropa e Lirë.

Endi Mekgafi, zëdhënës i BE-së në Bosnjë, tha se tensionet rrezikojnë ndihmën e Komisionit Evropian, e cila parashihet për qeveritë rajonale, me qëllim harmonizimin e legjislacionit të tyre me standardet evropiane.

Tensionet e vazhdueshme midis dy njësive të Bosnjës, federatës myslimano-kroate dhe Republikës Serbe, kanë zvarritur reformat e nevojshme për integrim në BE dhe në NATO, si dhe kanë vonuar formimin e qeverisë qendrore, 11 muaj pas zgjedhjeve të tetorit.