BQK-ja paralajmëron rënie ekonomike

Ekonomia e vendit do të pësojë rënie si pasojë e pandemisë.

Banka Qendrore, mes tjerash, parasheh edhe ulje të remitencave, që përbëjnë 10% të GDP-së së Kosovës.

Mirëpo, sipas guvernatorit, gjendja për momentin është stabile për shkak të menaxhimit që po bëhet.

Mehmeti, në një konferencë për media, tha se bankat po vazhdojnë të kenë likuiditet, raportojnë mediat shqiptare, përcjell albinfo.ch.

Tutje, ai ka shtuar se ka furnizim me para të gatshme.

Sipas Mehmetit, edhe dezinfektimi i parave ka filluar.

Banka Qendrore, në fillimin e përhapjes së koronavirusit në Kosovë ka marrë vendim që të shtyhet pagesa e kësteve të kredisë pa interes ndëshkues.

Guvernatori i BQK-së ka sqaruar se bankave u lejohet që klientëve t’ua faturojnë interesin e këstit për muajt e shtyrë.

Banka Qendrore e Kosovës ka kërkuar që qytetarët t’i evitojnë pagesat me kesh, për të parandaluar rrezikun e përhapjes së COVID-19.

---