Bregdeti i Durrësit pastrohet nga ujërat e zeza

Është lëshuar në funksion impianti gjigant që shkarkon ujërat e zeza nga bregdeti i Durrësit, duke e bërë këtë bregdet më të pastrin në rajon

Pushuesit kosovarë, por dhe ata të diasporës që preferojnë pushimet verore në bregdetin e Shqipërisë, do të kënaqen sivjet me ujin e pastër të bregdetin të Durrësit. Kështu deklaroi kryeministri shqiptar, Sali Berisha derisa inauguroi impiantin e pastrimit të ujërave të zeza.

“Durrësi me këtë impiant do të hyjë në hartën e qyteteve me ujërat më të pastra në rajon dhe Evropë. Durrësi me këtë impiant, do të rrisë në mënyrën më të ndjeshme kapacitetet e tij turistike. Çdo turist do ketë dëshirë të kalojë pushimet mes ujërave të pastra dhe mikpritjes së madhe”, deklaroi ai.

Kryeministri theksoi se në 4 vitet që do vijnë, impiante si ky i Durrësit do të kenë dhe qytete të tjera.

“Impiant për Vlorën, Lezhën, Korçën e kështu me radhë. Ne jemi të vendosur të kthejmë brigjet e deteve dhe liqeneve tona me brigjet më të pastra në Ballkan dhe Evropë. Ky është zotimi ynë para qytetarëve shqiptarë. Ky është angazhimi ynë për mbrojtjen e qytetit të tyre”, tha Berisha.

Ndryshe, ujërat e zeza që janë derdhur për vite të tëra në bregdetin e Durrësit, kanë ndikuar që viteve të fundit, pushuesit të ikin në bregdetin e Jonit, në Sarandë, Orikum, Dhërmi, por edhe në Ulqin e Velipojë.

Prandaj që investimi i disa viteve të mos shkoj huq, Autoritet Shqiptare ndërtuan një landfill gjigant që shkarkon ujërat e zeza në Shën Vlash. Me këtë investim, autoritete shqiptare pretendojnë t’ia kthejnë shkëlqimin bregdetit të Durrësit, i cili ka qenë destinacion i turistëve kosovarë për disa vite.

Shtrirja e rrjetit të mbledhjes së ujërave të zeza ka qenë i domosdoshëm dhe emergjent, sidomos në zonën turistike të Golemit, Pishat e Buta, Mali i Robit, Shkëmbi i Kavajës e në Plazh, ku ujërat e zeza vërshonin lumë në det.