Britania shënon rekord të vdekjeve nga alkooli gjatë pandemisë

pixabay - alkool

Britania e Madhe regjistroi rritje rekorde të numrit të vdekjeve të shkaktuara nga keqpërdorimi i alkoolit vitin e kaluar. Zyrtarët e shëndetit publik thanë se kjo rritje është e lidhur me ndikimin më të gjerë social të pandemisë.

8.974 persona raportohet të kenë vdekur nga shkaqet e lidhura me alkoolin vitin e kaluar në Britani të Madhe, 18.6 për qind më shumë se në vitin 2019. Kjo është rritja më e madhe e shifrës që nga fillimi i mbajtjes së kësaj statistike më 2001, tha Zyra për Statistika Kombëtare e Mbretërisë së Bashkuar.

Të dhënat e mëhershme nga autoritetet shëndetësore në Angli kanë shfaqur rritje prej 21 për qind të numrit të vdekjeve nga sëmundja alkoolike e mëlçisë vitin e kaluar, kur pandemia i mbylli pijetoret, por ndikoi që konsumuesit e mëdhenj të pinin më shumë alkool në shtëpi, shkruan Reuters.

“Fakti që shkalla e vdekshmërisë nga shkaktarët kyçë të vdekjeve të lidhura me alkoolin janë rritur më 2020, sugjeron se rritja e dëmit nga alkooli është ndikim më i gjerë i pandemisë”, tha Zyra për Përmirësim Shëndetësor dhe Pabarazi.

Sasia e përgjithshme e alkoolit të shitur në Britani vitin e kaluar shënoi rënie të vogël, por një anketë e marsit të këtij viti shfaqi rritje të numrit të njerëzve që kanë pranuar se kanë pirë sasi që zyrtarët shëndetësorë e cilësojnë të rrezikshme – të barabartë me pesë shishe verë në javë për burrat ose me tri shishe e gjysmë për gratë.