Britania teston program AI për “parashikimin e vrasjeve”

(KEYSTONE/DPA/Frank Rumpenhorst)

Mbretëria e Bashkuar po zhvillon një program të inteligjencës artificiale me qëllimin ambicioz për të parandaluar krimet e rënda përpara se ato të ndodhin. I njohur fillimisht si “Projekti i Parashikimit të Vrasjeve” dhe më pas i riemërtuar si “Ndarja e të dhënave për të përmirësuar vlerësimin e rrezikut”, programi është zbuluar nga organizata britanike Statewatch përmes dokumenteve të siguruara përmes Aktit të Lirisë së Informacionit.

Sipas autoriteteve britanike, algoritmet përdoren për të identifikuar individët me rrezik më të lartë për të kryer krime të dhunshme, bazuar në të dhëna nga shërbimet e burgjeve, provës dhe policisë. Ministria e Drejtësisë deklaron se fokusi është vetëm mbi persona të dënuar më parë, duke përfshirë të dhëna si gjinia, përkatësia etnike dhe shëndeti mendor, transmeton albinfo.ch.

Megjithatë, Statewatch ngre shqetësime serioze, duke pretenduar se edhe persona pa dënime penale janë përfshirë në sistem, përfshirë viktima të dhunës në familje apo ata që kanë kryer vetëlëndim. Kjo ka nxitur kritika të forta, me organizatën që e cilëson programin si “të frikshëm dhe distopian”, duke paralajmëruar për rrezikun e paragjykimeve strukturore ndaj komuniteteve të racizuara dhe me të ardhura të ulëta.

Eksperti i teknologjisë, Guido Berger, vëren se përdorimi i AI në luftimin e krimit po bëhet gjithnjë e më i zakonshëm, por paralajmëron për rrezikun e përforcimit të diskriminimeve ekzistuese. “Nëse të dhënat janë të paragjykuara, edhe sistemi do të jetë i tillë,” thotë ai, shkruan RTS.

Deri tani, autoritetet britanike theksojnë se programi është ende në fazën kërkimore, por debatet mbi etikën dhe të drejtat e njeriut veçse kanë nisur, transmeton albinfo.ch.