Broshura “Mirë se vini në Zvicër”, edhe në shqipe

Pos në ghjuhët e vendit, broshura është e botuar edhe në gjuhën shqipe, angleze, arabe, portugeze, ruse, serbe, spanjolle, turke dhe tamile

Enti Federal për Migracion ka botuar një broshurë të re drejtuar të huajve të rinj që vijnë për të jetuar në Zvicër. Në 20 faqet e broshurës që titullohet “Mirë se vini në Zvicër” janë përmbledhur në 12 gjuhë informacione themelore që kanë të bëjnë me jetën në Zvicër.

Të huajt e porsaardhur në Zvicër ardhjen këtu e përjetojnë si hyrje në një vend dhe shoqëri të panjohur. Për një integrim të suksesshëm nevojiten informacione të mira dhe të shpejta lidhur me jetën që i pret në rrethin e ri, përfshirë të drejtat dhe detyrimet që marrin, thuhet në komunikatën për medie të lëshuar nga Enti Federal për Migracion.

Këto të dhëna përfshihen në broshurën e re, parathënien e të cilës e ka shkruar ministrja e drejtësisë Simonetta Sommaruga. Në parathënie Sommaruga thotë se kjo broshurë është një instrument përshëndetjeje, i cili përmban në vete vlerat themelore që vlejnë në gjithë Zvicrën, të drejtat, detyrimet, porositë kryesore lidhur me integrimin si dhe informacione praktike mbi kushtet e jetës dhe të punës.

Kjo broshurë do t`u jepet të porsaardhurve përmes institucioneve të kantoneve, të qyteteve dhe të komunave për plotësimin e informacioneve që tashmë i kanë.

Përveç në gjuhët e vendit, pra në gjermanishte, frëngjishte dhe italishte, broshura është e botuar edhe në gjuhën shqipe, angleze, arabe, portugeze, ruse, serbe, spanjolle, turke dhe tamile.