Bujar Osmani pranon humbjen në Çair: “Urime kundërkandidatit tim dhe koalicionit fitues”

Kandidati i AKI-së për kryetar të Komunës së Çairit, Bujar Osmani, ka reaguar pas përfundimit të procesit zgjedhor, duke i uruar fitoren kundërshtarit të tij nga koalicioni VLEN, Izet Mexhiti. Në një postim në Facebook, Osmani theksoi se rezultati është vendim i qytetarëve dhe se ai e respekton plotësisht këtë vullnet.

“Dua të shpreh kënaqësinë time për një ditë zgjedhore të qetë dhe demokratike. Falënderoj të gjithë bashkëpunëtorët dhe mbështetësit që kontribuan gjatë fushatës. Ishte një periudhë e ngarkuar, por edhe e mbushur me energji dhe miqësi të reja”, shkroi Osmani.

Ai pranoi se fushata nuk ka qenë plotësisht e barabartë, por shtoi se “ndershmëria dhe vlerat kanë kuptim vetëm kur ruhen edhe në situata të vështira”.

“Urime kundërkandidatit tim dhe të gjithë koalicionit që qëndroi pas tij. Uroj që drejtimi i komunës në katër vitet e ardhshme të sjellë zhvillim dhe përmirësim për qytetarët e Çairit”, theksoi Osmani.

Në fund të reagimit të tij, ai falënderoi familjen për mbështetjen e pakushtëzuar dhe paralajmëroi se për hapat e ardhshëm politik do të njoftojë në ditët në vijim.