Burkhalter për barazpeshë në raport me BE-në

Mbeten të hapura shumë gjëra: nga mundësia e heqjes dorë prej marrëveshjes e deri te gjetja e një zgjidhjeje brenda në një pako

Refuzimi nga ana e BE-së për të negociuar Marrëveshjen për Lëvizjen e Lirë me Zvicrën, nuk i ka ardhur në befasi presidentit të federatës, Didier Burkhalter. Ai ka thënë se ka qenë e qartë që BE-ja do të kishte probleme me këtë negociim.

Por, Burkhalter nuk ka dashur të nxirrte përfundime të shpejta nga e gjithë kjo. “Në një proces të tillë ku ndodhemi ne, nevojitet kohë, qetësi dhe guxim”. Gjatë javëve dhe muajve në vijim, Këshilli Federal do të diskutojë mundësitë nga aspekti strategjik. Mbeten të hapura shumë gjëra: nga mundësia e heqjes dorë prej marrëveshjes e deri te gjetja e një zgjidhjeje brenda në një pako.

Por ajo që ka rëndësi më shumë, sipas Burkhalterit  është ruajtja e një barazpeshe në marrëdhëniet e Zvicrës me BE-në. Ai ende nuk e sheh me pesimizëm pozicionin e Zvicrës. “BE-ja nuk dëshiron të negociojë parimet e lëvizjes së lirë. Por ajo nuk thotë se nuk dëshiron të diskutojë dhe pranon debatin për dosjet tjera. Kjo tregon se ekziston një shans i mirë. Ndërsa anulimi i marrëveshjes do të ishte problematik pasi që kjo do të kuptohej si anulim i të gjitha marrëveshjeve bilaterale, ka thënë Burkhalter.

Por, presidenti ka thënë më tutje: “ne do të punojmë shumë, si ekip, do të diskutojmë dhe luftojmë  për një barazpeshë në këtë raport, i cili ka rëndësi për të gjithë, për popullin, për familjet, për vendet e punës”.