Bushati: Vendimi për dëbimin e diplomatëve rusë s’ishte i lehtë

Ministri i Jashtëm i Shqipërisë, Ditmir Bushati, ka komentuar vendimin e Shqipërisë për t’iu bashkuar vendeve të NATO-s për dëbimin e agjentëve rusë.

Bushati tha se ky vendim ka ardhur 48 orët e fundit si koordinim brenda aleancës së NATO-s, si përgjigje të veprimeve të kohëve të fundit. Megjithatë ministri shtoi se ky nuk ishte aspak një vendim i lehtë për Qeverinë e Shqipërisë, por që u mor pas konsultimeve me partnerët ndërkombëtarë, konkretisht SHBA-në e NATO-n, përcjell albinfo.ch.

Shqipëria ka vendosur të dëbojë dy diplomatë rusë, duke u rreshtuar kështu krah SHBA-së.

E ish-ministri i Jashtëm i Shqipërisë, Paskal Milo, tha se dy diplomatët rusë, Vladislav Filipov, atashe ushtarak, si dhe Alexey Nikolaevich Balashov, sekretar i parë i Ambasadës, mund të jenë agjentë të shërbimeve ruse. Ai shpjegoi edhe ‘notën verbale për shpalljen si persona të padëshirueshëm të dy diplomatëve rusë, veprimtaria e të cilëve nuk përputhet me statusin e tyre diplomatik’.