Caritas: Zvicra duhet të dyfishojë ndihmën për refugjatët e Sirisë

Zvicra do të duhej ta shtonte ndihmën e saj vjetore për Sirinë, e cila aktualisht është 50 milionë franga në së paku 100 milionë franga, kërkon Caritasi zviceran. Kjo organizatë humanitare e Kishës Katolike ka treguar angazhim të vazhdueshëm për refugjatët kudo që ata janë dhe kujdeset edhe për azilkërkuesit në Zvicër.

Me 100 milionë frangat që do të jepeshin, drejtori i Caritasit, Gugo Fassel mendon se do të  forcohej ndihma për mbijetesë dhe ndjekja e shkollimit për fëmijët e refugjatëve sirianë, të strehuar në vendet fqinje.

Më tutje, Qeveria e Zvicrës do të duhej që t`u ofrojë më tepër mbështetje për përkujdesjen e refugjatëve, komunave dhe kantoneve më të ngarkuara.

Zvicra ka shprehur gatishmërinë që në kuadër të programit të BE-së për shpërndarjen e refugjatëve, të strehojë gjithsej 1500 refugjatë nga Siria.