Chollet telefonin Kurtin e Vuçiqin

Këshilltari i lartë i Departamentit amerikan të Shtetit, Derek Chollet ka telefonuar kryeministrin e Kosovës Albin Kurtin dhe Presidentin e Serbisë, Aleksandar Vuçiq para se këta të fundit të takohen në Ohër të shtunën e 18 marsit.

Chollet ka shkruar në llogarinë e tij në Twitter pas bisedës që ka pasur me Kurtin dhe thotë se i rikujtoi atij rëndësinë që ka takimi e së shtunës. “Bisedova me kryeministrin e Kosovës, Albin Kurti, lidhur me bisedimet e 18 marsit lidhur me normalizimin e raporteve me Serbinë përmes dialogut të ndërmjetësuar nga BE-ja. Zbatimi i planit evropian do të ofrojë përfitime domethënëse për të dyja vendet dhe do të tregojë përkushtim për një të ardhme paqësore në rajon”, është shprehur ai.

Përveç me Kurti, Chollet ka folur edhe me Vuçiq me të njëjtin mission. “Bisedë e mirë me presidentin Vuçiq. U pajtuam në rëndësinë e angazhimit konstruktiv në propozimin e konsoliduar të BE-së më 18 mars. Riafirmova mbështetjen e SHBA-së për dialogun e ndërmjetësuar nga BE-ja dhe përfitimet që normalizimi i raporteve do t’i sillte Serbisë dhe gjithë rajonit të Ballkanit Perëndimor”, ka shkruar Chollet në Twitter.

Kurti dhe Vuçiq takohen më 18 mars në Ohër për të negociuar mbi planin e zbatimit të Marrëveshjes për normalizimin e marrëdhënieve mes Kosovës dhe Serbisë.