Çka thonë Haradinaj e Thaçi për takimin në Berlin?

Ramush Haradinaj (Facebook)

Krerët e Kosovës i janë bashkuar takimit në samitin e Berlinit, ku janë pritur nga kancelarja gjermane, Angela Merkel dhe presidenti francez, Emmanuel Macron, shkruan albinfo.ch.

Kryeministri i Kosovës, Ramush Haradinaj, këtë takim e ka vlerësuar si mundësi të mirë për liderët e rajonit, që të flasin hapur për sfidat dhe aspiratat e përbashkëta drejt rrugës euro-atlantike.

“Pritje nga Kancelarja Merkel dhe Presidenti Macron, në fillimet e takimit të nivelit të lartë për vendet e Ballkanit Perendimor. Ky takim është një mundësi e mirë që liderët e rajonit të flasim hapur për sfidat dhe aspiratat e përbashkëta drejt rrugës euro-atlantike”, ka shkruar Haradinaj, përcjell albinfo.ch.

Kurse Presidenti i Kosovës, Hashim Thaçi, ka shpërndarë disa fotografi nga takimi, siç e ka quajtur ai “mikpritja gjermano franceze”.

Kancelarja Angela Merkel më parë është takuar edhe me përfaqësuesit e Shqipërisë, ku siç njoftoi ministri i Jashtëm në detyrë, Gent Cakaj, Merkel ka konfirmuar mbështejen absolute për hapjen e negociatave për anëtarësimin e Shqipërisë në BE.