Çmimi i naftës dhe të ardhurat: Shqipëria më e shtrenjta, Zvicra ndër më të lirat

Në Zvicër nafta kushton 1.71 euro, megjithatë, të ardhurat janë shumë më të mëdha dhe kjo bën në renditje në jetë në vendin e 32-të nga 35 shtete

Një litër naftë në Shqipëri kushton 1.61 euro, duke u renditur në vlerë absolute e 11-a më e shtrenjtë në Evropë, pas shteteve të tilla si Norvegjia, Suedia, Zvicra, Italia, Danimarka, Belgjika Franca, që kanë të ardhura shumë më të larta sesa shqiptarët.

Në raport me fuqinë blerëse, Shqipëria ka naftën më të shtrenjtë në Evropë, teksa qytetarëve të saj u duhen 4.5% të të ardhurave të saj për të blerë një litër naftë.

Të dhënat janë përpunuar nga “Monitor”, bazuar në informacionin mbi çmimin e naftës që jepet nga Global Price Petrol dhe të ardhurat për frymë sipas metodës së fuqisë blerëse, të Bankës Botërore (më të fundit janë të vitit 2017). Treguesi mat përballueshmërinë, në bazë të përqindje së të ardhurave ditore që duhet për një litër karburant, përcjell albinfo.ch.

Shqipëria ka dhe të ardhurat për frymë më të ulëtat në Evropë, bazuar në fuqinë blerëse, me 12,943 dollarë ndërkombëtarë, një njësi e Bankës Botërore që mat prodhimin e brendshëm bruto sipas barazisë së fuqisë blerëse.

Pas Shqipërisë, nafta është më e shtrenjtë në Serbi (3.7% e të ardhurave ditore), Bosnja (3.6), Maqedonia e veriut (2.8), Mali i Zi (2.6).

Në Greqi, ku nafta ka çmim të njëjtë me Shqipërinë, prej 1.6 euro/litër, qytetarëve të saj u duhen 2% e të ardhurave ditore, ndërsa në Danimarkë, ku nafta kushton 1.67 euro/litër, u duhen vetëm 1.1% e të ardhurave ditore.

Në Zvicër nafta kushton 1.71 euro, megjithatë, të ardhurat janë shumë më të mëdha dhe kjo bën në renditje në jetë në vendin e 32-të nga 35 shtete. Para saj janë Austria dhe Gjermania.

---