CNN: Shqipëria duhet vizituar më 2017

17 vendet që duhet vizituar në 2017-n e fut Shqipërinë në listë me vendet e njohura si Franca, Danimarka, etj

Rrjeti i madh mediatik amerikan ‘CNN’, ka publikuar një artikull rekomandues për 17 vendet e botës që duhet vizituar në vitin 2017, përcjell albinfo.ch.

“CNN” është njëra nga mediat e mëdha ndërkombëtare që rekomandon se Shqipëria duhet vizituar, derisa gjithashtu është e pasur me shumë bukuri.

“17 best places to visit in 2017” apo 17 vendet që duhet vizituar në 2017-n e fut Shqipërinë në listë me vendet e njohura si Franca, Danimarka, etj. Në rreshtat e parë për Shqipërinë, pesë gazetarët e CNN që kanë shkruar artikullin thonë:

“Shqipëria, vendi i vogël mesdhetar, dikur një nga më të izoluarit të shteteve staliniste nga epoka e Luftës së Ftohtë, i cili ka qenë i mbajtur ‘sekret’ nga Evropa në mes të dy dekadave të fundit. Ka shumë diell dhe kilometra të tëra me plazhe të pacenuar dhe të virgjër”, thuhet në artikull.

Në rekomandimin për Shqipërinë, thuhet se vendi ka një kulturë të ngjashme të ushqimit me fqinjin e saj, Greqinë, por me çmime përgjysmë më të lira. “CNN” thotë se Shqipëria që nga vitet e ’90-ta ka përparuar dukshëm. Ata rekomandojmë që të vizitohen edhe objektet që tregojnë për regjimin e gjatë të diktatorit shqiptar, Enver Hoxha.

“Në periferi të kryeqytetit, në Tiranë, ndodhet ‘Bunk’Art’ që ka transformuar kompleksin nëntokësor të Hoxhës në një qendër kulturore. Aty janë disa dhoma që tregojnë historinë e diktatorit shqiptar… Në zemër të kompleksit është një amfiteatër sekret i madh nëntokësor, i projektuar për qeverinë e Hoxhës, e që tani përdoret për koncerte jazz-i”, thuhet më tutje në artikull.