Fakte tronditëse: 11-vjeçarja e dhunuar ditë më parë është abuzuar seksualisht për më shumë se 1 vit

Rasti që tronditi opinionin në Kosovë ditë më parë, ku disa persona dhunuar fëmijën 11-vjeçar, po del të mos jetë i izoluar.

Sot gjatë ditës, ministri i Brendshëm, Xhelal Sveçla, në një konferencë për media deklaroi se në rastin e 11-vjeçares ka pasur dështime të njëpasnjëshme të institucioneve përgjegjëse.

Sipas tij, e mitura ka qenë e dhunuar seksualisht përgjatë një viti, transmeton Albinfo.ch.

“Kemi kuptuar se nuk bëhet fjalë për një rast, fatkeqësisht nuk bëhet fjalë as për dy raste. Por, bëhet fjalë për më shumë raste të keqpërdorimit dhe dhunimit të miturës 11-vjeçare. Unë kërkesën kryeshefit të Inspektoratit Policor të Kosovës ia kam bërë drejtpërdrejt, në mënyrë që të gjithë të përfshirët në këtë rast, hetuesit policorë të thirren në cilësinë e dëshmitarit në mënyrë që institucionet e Kosovës, i gjithë publiku, të informohet drejt mbi atë se çfarë ka ndodhur, mbi atë se çfarë institucionet e Republikës së Kosovës kanë ndërmarrë, mbi atë se çfarë institucionet e sigurisë së Kosovës po ndërmarrin dhe po ashtu që sa më shpejt që është e mundur, urgjentisht të dalim me të gjitha gjeturat e këtij rasti, jashtëzakonisht të rëndë”, deklaroi Sveçla.

“Nuk mund të them saktësisht, meqenëse çështja është nën hetim. Por, mund të them se është mbi një vit…. Unë po ju them se çfarë ne jemi duke hetuar, indikacionet e para, apo informatat janë se kjo e mitur është dhunuar për më shumë se një vit”, ka shtuar Sveçla.