Debat i frytshëm në Hamburg, me pjesëmarrjen e tre ambasadorëve

Përmes këtij takimi u trajtuan tema të ndryshme si dhe u mundësua një njohje me njëri-tjetrin brenda për brenda komunitetit shqiptar dhe institucioneve të ndryshme që veprojnë në Hamburg

Nën udhëheqjen e organizatës ODA Hamburg u organizua për herë të parë një debat publik me tre ambasadorët: atë të Republikës së Shqipërisë, Maqedonisë së Veriut si dhe të Republikës së Kosovës.

Përmes këtij takimi u trajtuan tema të ndryshme si dhe u mundësua një njohje me njëri-tjetrin brenda për brenda komunitetit shqiptar dhe institucioneve të ndryshme që veprojnë në Hamburg, thuhet në një postim të kësaj organizate, të shpërndarë në Facebook.

Në mesin e të pranishmëve ishin edhe Konsulli i ri i Republikës së Kosovës në Hamburg, Gramos Begolli si dhe Sami Musa, kandidat me origjinë shqiptare nga radhët e SPD-së, i cili garon në zgjedhjet e Landit të Hamburgut.

Në sallën, e cila ishte e mbushur deri në vendin e fundit, mbretëroi një atmosferë mbresëlënëse, ku u zhvillua një debat shumë konstruktiv nga të gjithë të pranishmit, tranmeton albinfo.ch.

ODA Hamburg e.V. do të vazhdojë të planifikojë edhe në të ardhmen mbrëmje të tilla unike. Ajo falënderon të gjithë pjesëmarrësit, të cilët erdhën nga vende të ndryshme të pjesës veriore të Gjermanisë.

Një falënderim i veçantë për tre Ambasadorët, S.E. Artur Kuko, S.E. Nazifi Ramadani si dhe S.E. Beqë Cufaj, thuhet në fund të postimit.

---