Demi ik nga kasapi, vritet nga policët

Një dem ka arritur të ikte në momentin që ishin duke e dorëzuar “në duar” të kasapit.

Kjo ka ndodhur në mëngjesin e sotëm, në Nebikon të Lucernit. Pikërisht para dyerve të thertores demi i racës galloway ia ka dalë të ikë nga makina transportuese.

Me të dalë prej aty ai ka sulmuar kalimtarët e rastit dhe policët që ndodheshin afër, por për fat, të gjithë kanë mundur të shpëtojnë pa pasoja. Më tutje demi ka vazhduar rrugën në afërsi të autostradës, duke u shndërruar kështu në rrezik për trafikun, shkruan news.ch.

Në këto rrethana, liria e tij nuk mund të zgjaste më shumë. Një patrullë e policisë së Lucernit e ka mbytur demin me një të shtënë të kontrolluar.