Dënohet me burg, fyente të huajt në Facebook

Shumë politikanë në Gjermani janë ankuar për rritjen e komenteve ksenofobike vitet e fundit, një fenomen që ka përkuar me ardhjen e qindra mijë refugjatëve në vend.

Një gjykatë në Würzburg, në jug të Gjermanisë, e ka dënuar një përdorues në Facebook me një vit e gjysmë burgim, sepse kishte shkruar aty komente ultra të djathta. Vitin e kaluar, një gjykatë tjetër lokale e kishte dënuar të njëjtin person mashkull me dy vjet e tre muaj burgim. Kjo pasi në vitin 2014 ai kishte publikuar slogane që bënin thirrje për dhunë dhe vrasjen e hebrenjve, të huajve dhe refugjatëve, shkruan DW, përcjell albinfo.ch.
Të hënën gjykatësit regjistruan se personi shprehu keqardhje që i kishte shkruar komentet. Megjithatë, ata e justifikuan dënimin, duke thënë se personi kishte një histori të gjatë fyerjesh dhe se shprehjet e urrejtjes janë shtuar në Gjermani.
Shumë politikanë në Gjermani janë ankuar për rritjen e komenteve ksenofobike vitet e fundit, një fenomen që ka përkuar me ardhjen e qindra mijë refugjatëve në vend.
Në shtator 2015 qeveria gjermane u kërkoi kompanive të internetit, si Google, Twitter dhe Facebook, që të largojnë shprehjet e urrejtjes nga faqet e tyre brenda 24 orëve pas raportimit. Por, shumë përdorues thanë se kërkesat e tyre për t’i hequr përmbajtjet fyese shpesh nuk marrin përgjigje.
Javën e kaluar politikani gjerman, Volker Kauder, propozoi një dënim me 50.000 euro për çdo koment fyes që kompanitë mediatike nuk e largojnë nga faqet e tyre.
Qeveria gjermane ndërkohë ka planifikuar të zbatojë një sistem kompensimesh për viktimat e urrejtjes në internet. Në shtator Zyra Federale e Policisë Kriminale nisi kërkime në gjithë vendin për të kapur ata që përhapin urrejtje në mediat sociale.