Detaje nga plagosja e pjesëtarit të Policisë së Kosovës në Klinë

Ministri i Punëve të Brendshme i Kosovës, Xhelal Sveçla, ka dhënë detaje rreth rastit, ku është plagosur një pjesëtar i policisë.

Ai ka thënë se pjesëtari i policisë, i plagosur gjatë reagimit në një tentim vjedhje në Kishën e Zllakuqanit, është Januz Veselaj, teksa u shpreh se është informuar nga drejtori i Policisë se Veselaj, pas tretmanit të nevojshëm në QKUK, është liruar në shtëpi.

“Përgëzoj zyrtarët policorë për përgjigjen e shpejtë në rast pas marrjes së informatës dhe zyrtarin Januz Veselaj për reagimin profesional, përkundër rrezikimit të jetës së tij. Kërkoj nga njësitet përkatëse zbardhjen sa më të shpejtë të këtij rasti dhe sjelljen e kriminelëve para drejtësisë. Kushdo që në çfarëdo forme tenton të cenojë jetën apo pronën e qytetarëve dhe shtetit tonë, do të ballafaqohet me forcën e ligjit”, ka shkruar ai, transmeton albinfo.ch.

Ndryshe, Policia e Kosovës ka njoftuar se në orët e para të mëngjesit të sotëm është plagosur një polic në Zllakuqan të Klinës nga persona që kishin hyrë në shtëpinë e një prifti.