Detaje për linjën hekurudhore Prishtinë-Durrës, do të kalojë në Gjakovë e Shkodër

Parashikohet që hekurudha të kalojë nga Durrësi, në Shkodër, për të vijuar në Gjakovë e më pas në Prishtinë

Në Shkodër u prezantua sot studimi i fizibilitetit për hekurudhën Durrës–Prishtinë.

Parashikohet që hekurudha të kalojë nga Durrësi në Shkodër, për të vijuar në Gjakovë e më pas në Prishtinë.

Në ceremoninë e rastit morën pjesë autoritete të larta shtetërore të të dy vendeve, si dhe kryetarët e bashkive ku pritet të kalojë hekurudha, përfshirë Shkodrën dhe Gjakovën, transmeton albinfo.ch.

Zëvendëskryeministrja e Shqipërisë, Belinda Balluku, njëherësh ministre e Infrastrukturës dhe Energjisë, tha se ky është një moment historik për Shqipërinë.

Balluku theksoi se “nuk flitet për një hekurudhë, por për një lidhje kombëtare, pasi është hekurudha kuqezi. Flitet për një nukël gjeopolitike, e cila e kthen kombin shqiptar në një pol magnetizmi për ekonominë dhe ndërlidhjen evropiane.”

Sipas Ballukut, kjo hekurudhë do të jetë një nyje ndërlidhëse e tre korridoreve evropiane dhe do t’i japë një rëndësi të veçantë zhvillimit politik dhe gjeopolitik të Evropës Juglindore. “Shpeshherë flasim për ndërlidhje rajonale, për ekonomi rajonale, por korridoret e infrastrukturës dhe ato energjetike nuk janë rajonale, janë evropiane. Kjo hekurudhë do të lidhet përmes Korridorit 8 me të gjitha akset e tjera që janë bërë publike. Gjithashtu, do të lidhet edhe me Korridorin 10, ndërsa nga ana tjetër prek edhe Korridorin Adriatiko–Jonian në një gjatësi shumë të rëndësishme të tij, duke e kthyer kështu në një nyje ndërlidhëse të tre korridoreve evropiane dhe duke i dhënë kësaj hekurudhe, në dukje kombëtare, një rëndësi të veçantë për gjithë zhvillimin politik dhe gjeopolitik të Evropës Juglindore,” u shpreh Balluku.

Duke u ndalur te Shkodra, Balluku tha se “e meriton të jetë nyja ndërlidhëse e kombit tonë”.

“Shkodrës i takon plotësisht, me ligj dhe me kanun, ta ketë këtë stacion të kombit shqiptar – një stacion hekurudhor që të jetë jo vetëm një stacion tranzit, por një stacion si në vendet evropiane,” tha ajo.

Sa i përket Gjakovës, ministrja tha se “mbart një histori të jashtëzakonshme, e cila ka vlera të paçmuara si për vendndodhjen e saj strategjike, ashtu edhe për ekonominë që zhvillon, por padyshim edhe gjeografikisht për gjithë ndërlidhjen që arrin të krijojë midis Shqipërisë dhe Kosovës”.

---