Dhoma e Kantoneve, jo dëbimit të të huajve me automatizëm

Ajo pajtohet me dëbimin e të huajve me dosje krimi por këmbëngul që kjo të bëhet vetëm pas shqyrtimit të rasteve veç e veç

Iniciativa për dëbimin e të huajve kriminelë, për të cilën zviceranët patën votuar në referendum para katër vitesh, mund të mos jetësohet sipas kërkesës së iniciatorëve. Kështu, Dhoma e Kantoneve e Parlamentit të Zvicrës në votuan e bërë sot ka devijuar nga teksti i iniciativës së përmendur, i cili kërkonte dëbimin e të huajve pa përjashtime, në rast të kryerjes së veprave penale të caktuara. Kjo domethënë se iniciativa nuk i linte hapësirë veprimi gjyqtarëve që të vendosin se cilat raste janë për dëbim dhe cilat jo.

Dhoma e Kantoneve pajtohet me dëbimin e të huajve me dosje krimi por ajo këmbëngul që kjo të bëhet vetëm pas shqyrtimit të rasteve veç e veç.

Ndryshe nga kjo dhomë, Dhoma Nacionale e Parlamentit pati vendosur për zbatimin strikt e pa përjashtime të iniciativës. Ajo e kishte bërë këtë e shtyrë nga kërcënimi i SVP/UDC si bartëse e asaj iniciative se do të niste edhe iniciativën tjetër, edhe më restriktive, për jetësimin e iniciativës së parë.

Dhoma e Kantoneve është treguar më e butë sa u takon “sekondove” të rinjve të gjeneratës së dytë, të cilët janë të lindur në Zvicër por nuk posedojnë shtetësi zvicerane, shkruan srf.ch. Këta, sipas dhomës së përmendur nuk duhet të dëbohen në mënyrë automatike nga Zvicra.