Diaspora proteston nesër në Bruksel për liberalizimin e vizave

Deputeti shqiptar në Bruksel, Ahmet Gjanaj njofton se me iniciativën e profesorit Nusret Pllana nesër do të protestohet para Parlamentit Evropian për të kërkuar liberalizimin e vizave për kosovarët.

“Bashkatdhetarë të nderuar të Belgjikës, të Evropës e më gjerë, Kosova dhe kombi ynë ka nevojë për bijtë dhe bijat e veta. Për 10 vjetorin e Kosovës si shtet, me një iniciativë të profesorit Nusret Pllana, në kuadër të dorëzimit 751 Eurodeputetëve dhe 28 EuroKomisionerëve të librit të tij ‘Terrori i Serbisë Pushtuese mbi Shqiptarët 1844-1999’, do të mbahet një protestë paqësore përpara Parlamentit Evropian”, thuhet në njoftim, përcjell albinfo.ch.

Pos liberalizimit të vizave, kërkesat e tjera janë edhe njohje nga pesë shtetet evropiane të Pavarësisë së Kosovës, kushtëzimi i njohjes së Pavarësisë së Kosovës nga Serbia për vazhdimin e integrimit evropian, si dhe të gjitha shtetet e Ballkanit Perëndimor (Shqipëria, Kosova, Bosnja, Mal i Zi, Maqedonia dhe Serbia) të bëhen pjesë të BE-së në të njëjtën kohë.