Diaspora të investojë në Kosovë

Katër ministra të Qeverisë së Kosovës ftuan sot diasporën kosovare që të investojë në vendin e tyre

Ministrat kosovarë kanë thënë se janë krijuar kushte të favorshme për investime të huaja. Përveç parave të gatshme që i dërgon për familjet e tyre, diaspora kosovare duhet edhe të investojë në Kosovë është thënë në konferencën “Tërheqja e investimeve nga diaspora”, organizuar nga Ministria e Diasporës, Oda Ekonomike dhe Organizata Ndërkombëtare për Migrim. Ministri i Diasporës, Ibrahim Makolli, ka deklaruar se Kosova ka kapacitete të mjaftueshme për investime. Sipas tij, Qeveria do të punojë edhe më tutje për përmirësimin e mjedisit dhe krijimin e kushteve sa më të favorshme për mërgimtarët që jetojnë dhe punojnë jashtë vendit.

Zëvendëskryeministrja dhe Ministrja e Tregtisë dhe Industrisë, Mimoza Kusari Lila, ka deklaruar se diaspora është fuqia më e madhe investuese që ka Kosova dhe potenciali i saj nuk është shfrytëzuar ende sa duhet.Kurse Ministri i Zhvillimit Ekonomik, Besim Beqaj, ka thënë se Kosova ka nevojë për investime në fushën e energjisë, por edhe në fusha tjera.

Edhe Ministri i Bujqësisë Blerand Stavileci bëri thirrje për investime në sektorin e bujqësisë, si një sektor me potencial të madh ekonomik dhe për hapjen e vendeve të punës.

Sipas të dhënave të Organizatës Ndërkombëtarë për Migrim, jashtë vendit jetojnë prej 500 deri në 900 mijë kosovarë, pjesa dërmuese e të cilëve kanë status legal. Kurse gjysma e tyre shkojnë për të punuar.

Sipas raporteve në 2010 dërgesat e tyre arrinin mbi 511 milionë euro.