“Dinastia e fotografëve Marubi, një portret i Shqipërisë”

‘BBC’ thekson se koleksioni i studios Marubi portretizon Shqipërinë e tri gjeneratave

Gjiganti televiziv britanik ‘BBC’, ia ka kushtuar një videomaterial ekspozitës së fotografisë së studios së parë shqiptare Marubi që është hapur në Amsterdam. ‘BBC’ në këtë rubrikë të titulluar “Fotografët Marubi, një portret i Shqipërisë” thekson se menjëherë pas shpikjes së fotografisë, një italian, Pietro Mariubi  ka filluar studion e parë fotografike në Shqipëri, përcjell albinfo.ch.

‘BBC’ thekson se koleksioni i studios Marubi portretizon Shqipërinë e tri gjeneratave.

Videomateriali nis me fotografinë e vitit 1922 të gruas shqiptare me kostume tradicionale për të vazhduar me prezantimin e fotografive të ndryshme, të shoqëruara me narracion dhe nën tingujt e këngës “Lule Bore” të krijuar nga Simon Gjoni.

Ky prezantim në ‘BBC’ nuk ka kaluar pa vëmendjen e kryeministrit të Shqipërisë, Edi Rama i cili ka bërë një postim në “Facebook”. “Nga ferri i errësirës gërryese plot lagështirë për 25 vjet, në paqen e Muzeut të ri Kombëtar të Fotografisë në Shkodër dhe tanimë nën dritën e vëmendjes së Evropës”, ka shkruar Rama.