Doktoraturë Nderi për ish presidentin e Zvicrës, Alain Berset

Sekretari i përgjithshëm aktual i Këshillit të Evropës u nderua për lidhjet e tij të ngushta me shkencat natyrore dhe mjekësinë gjatë pandemisë

Ish-Këshilltari Federal dhe ish presidenti, Alain Berset ka marrë një doktoraturë nderi nga Fakulteti i Matematikës dhe Shkencave Natyrore në Universitetin e Fribourg-ut.

Berset i cili është sekretar i përgjithshëm aktual i Këshillit të Evropës u nderua për lidhjet e tij të ngushta me shkencat natyrore dhe mjekësinë gjatë pandemisë, siç u njoftua nga Universiteti i Fribourgut, transmeton albinfo.ch.

Ish-Ministri i Shëndetësisë, Berset, ka nxitur bashkëpunim të fortë dhe konstruktiv midis politikës dhe kërkimit, deklaroi universiteti në arsyetimin e tij. Fakulteti gjithashtu theksoi rolin e tij si ndërmjetës midis shkencës, politikës dhe shoqërisë, përmes të cilit ai forcoi dialogun dhe promovoi vendimmarrjen e bazuar në prova.

Një doktoraturë nderi nga Fakulteti i Arteve dhe Shkencave Humane iu dha ambasadorit Jacques Pitteloud. 63-vjeçari nga Valisi, ish-kreu i Shërbimit Federal të Inteligjencës, është aktualisht ambasadori i Zvicrës në Belgjikë dhe kreu i Misionit Zviceran në NATO.

---