Donatorët përgjysmuan fondet për Kosovën

Donatorët kanë përgjysmuar ndarjet e tyre financiare për Kosovën ndërmjet periudhës janar-shtator të këtij viti në krahasim me periudhën e njëjtë të një viti më parë, shkruan “Koha Ditore”. Deri më 30 shtator Kosova ka pranuar 7 milionë e 772 mijë euro nga grantet e përcaktuara të donatorëve, derisa në fundin e shtatorit të vitit 2010 vlera e granteve të pranuara nga donacionet arrinte në 15 milionë e 314 mijë euro.

Raporti i hartuar nga Ministria e Financave tregon se disa nga institucionet ndërkombëtare të cilat në vitet e kaluara kanë qenë shtylla kryesore e ndarjes së fondeve në formë të donacioneve, kanë minimizuar ose ndërprerë në tërësi dhënien e mjeteve për Kosovën. Zyra Civile Ndërkombëtare (ICO) nuk i ka dhënë asnjë cent Kosovës për nëntëmujorin e këtij viti. Në periudhën e njëjtë të vitit 2010, ky institucion ndërkombëtar ka ndarë për vendin 165 mijë euro në formë të donacioneve.

Njësoj sikurse ICO-ja ka vepruar edhe Kryqi i Kuq, Qeveria e Belgjikës, organizata “Save the Children” dhe UNMIK-u. Kosova ka përfituar vetëm 531 milionë euro nga donatorët që nga mbajtja e konferencës në korrik të vitit 2008, ndonëse ishte paraparë që të vinin 694 milionë euro. Konferenca e donatorëve e mbajtur në korrik të vitit 2008, nuk ia solli Kosovës të gjitha paratë e premtuara dhe të zotuara nga vendet, kryesisht ato evropiane.

Tabelat e hartuara nga Ministria e Integrimeve tregojnë se Agjencia e Shteteve të Bashkuara për Zhvillim Ndërkombëtar (USAID) është donatori kryesor për Kosovën. Nga ky institucion Kosova ka pranuar 192 milionë euro deri më tani, ndonëse ishin zotuar vetëm 75 milionë.