Drashkoviq: Realiteti nuk ndryshohet, Kosova është shtet i pavarur

“Kosovën si shtet të pavarur sot e njeh pjesa dërmuese e vendeve anëtare të OKB-së dhe BE-së. Serbia tash nuk mund ta ndryshojë këtë realitet”, ka deklaruar Drashkoviq

Politikani, shkrimtari dhe ish-ministër i Punëve të Jashtme të Serbisë, Vuk Drashkoviq, ka ndryshuar dukshëm kursin e tij nga Kosovës, duke theksuar se Kosova është një shteti pavarur dhe realiteti atje nuk mund të ndryshohet. Dikur politikan radikal dhe nacionalist, tani Drashkoviq thotë se Serbia duhet të vendos bashkëpunim të gjithanshëm me shqiptare në Kosovë, pa njohjen formale të pavarësisë.

“Shqiptarët e kanë pranuar dokumentin e Ahtisaarit (Marty) dhe disa nga themelet e tij i kanë përfshirë edhe në Kushtetutën e Kosovës. Sipas atij dokumenti, është ndaluar bashkimi i Kosovës me Shqipërinë apo aneksimi i Kosovës apo marrja e ndonjë pjese të territorit të vendeve fqinje”, thotë Drashkoviq për “Blic”.

Ai tutje thotë se Kosova është detyruar që të heqë dorë edhe nga flamuri i Shqipërisë si flamur i vet, që gjuha serbe dhe cirilika të pranohen zyrtarisht në tërë territorin, që serbëve t’u garantohen minimalisht 10 vende në Parlament dhe e drejta e vetor në ligje të cilat mund të cenojnë pozitën si popull konstituiv.

“Komunave me shumicë serbe i është garantuar shkallë e lartë e kulturës dhe autonomisë ekonomike, me të drejt në lidhje speciale ekonomike dhe kulturore me Serbinë, prani të lartë në polici, vetëqeverisje dhe gjyqësi”, thotë Drashkoviq, citoj lajmi.net.

Sipas tij, në dokumentin e Ahtisaarit shkruan se “të gjitha kishat dhe manastiret serbe në Kosovë, si dhe pasuria e tyre, janë në pronësi të Kishës Ortodokse serbe me seli në Beograd”.

“Kosovën si shtet të pavarur sot e njeh pjesa dërmuese e vendeve anëtare të OKB-së dhe BE-së. Serbia tash nuk mund ta ndryshojë këtë realitet. Atë që mundem është që negociatorët tanë në Bruksel të tentojnë që të nxjerrin diçka më shumë se dokumenti i Ahtisaarit”, ka thënë ish-ministri serb i Punëve të Jashtme, Drashkoviq.