Drejtori i Policisë së Kosovës viziton EUROPOL-in, kërkon avancim të bashkëpunimit

Kosovo Police

Drejtori i Përgjithshëm i Policisë së Kosovës, Gazmend Hoxha, këtë të martë është pritur në takim nga drejtoresha ekzekutive e EUROPOL-it.

Ai ishte i shoqëruar nga një delegacion nga MPB-ja dhe AKSP-ja që po marrin pjesë në forumin për bashkëpunim strategjik të projektit CEPOL WB PACT- projekti i CEPOL-it për mbështetje në trajnime për vendet e Ballkanit Perëndimor në luftën kundër terrorizmin, që po mbahet në EUROPOL në Hagë më 30 dhe 31 janar 2024.

“Në kuadër të këtij aktiviteti Drejtori i Përgjithshëm i Policisë, së bashku me delegacioninin, z Besnik Sallahu, zyrtar ndërlidhës në EUROPOL, z. Kastriot Jashari, drejtor i AKSP-së dhe z. Ron Krasniqi –përfaqësues nga MPB-ja, po mbajnë një takim të veçantë me drejtoreshën ekzekutive te EUROPOL-it, znj. Catherine De Boll, në të cilin takim diskutohet për bashkëpunimin mes Policisë së Kosovës dhe EUROPOL-it, punën e zyrës ndërlidhëse të Kosovës në EUROPOL dhe për hapat e mëtejmë për avancimin e bashkëpunimit në luftën e përbashkët kundër krimit të organizuar, krimeve të rënda, terrorizmit dhe krimeve kibernetike”, thuhet në njoftim.

“Drejtori Hoxha falënderoi EUROPOL-in për bashkëpunimin dhe mbështetjen, si dhe paraqiti synimin për avancim të mëtejmë të bashkëpunimit drejt një marrëveshjeje operacionale me EUROPOLI-in, rritjen e kontributit në kuadër të hetimeve dhe operacioneve të EUROPOL-it”, sqaron tutje njoftimi.