Dua Lipa kontribuon në rritjen e ekonomisë britanike me 8 miliardë funte

Këngëtarja me prejardhje kosovare, Dua Lipa, është bërë një ndër figurat më të rëndësishme të industrisë muzikore britanike, duke ndihmuar që ekonomia e Mbretërisë së Bashkuar të përfitojë rreth 8 miliardë funte gjatë vitit të kaluar, përcjell albinfo.ch.

Ylli botëror, e njohur për hitet “New Rules”, “Levitating” dhe albumin më të fundit “Radical Optimism”, renditet ndër artistet me ndikimin më të madh financiar në industrinë muzikore britanike. Sipas raportit vjetor të organizatës “UK Music”, suksesi i Lipës kontribuoi në një rritje prej pesë për qind të të ardhurave të përgjithshme të sektorit muzikor.

Albumi “Radical Optimism” debutoi në vendin e parë në toplistat muzikore, ndërsa koncertet promovuese në Singapor, Japoni dhe Malajzi gjeneruan të ardhura nga eksporti në vlerë prej 4.8 miliardë funtesh. Krahas saj, artistë si Taylor Swift, Liam Gallagher, grupi “Take That” dhe Bruce Springsteen, kanë dhënë gjithashtu një kontribut të rëndësishëm në këtë sukses ekonomik.

Nga totali prej 8 miliardë funtesh, rreth 1.49 miliardë janë gjeneruar nga shitjet fizike të albumeve, shkarkimet online dhe transmetimet në platforma digjitale — një rritje e ndjeshme krahasuar me 7.6 miliardë që ishin regjistruar në vitin 2023.

Në raportin e “UK Music” theksohet se industria muzikore britanike punëson mbi 220 mijë persona, por njëkohësisht paralajmërohet se ritmi i rritjes pas pandemisë po ngadalësohet.

Shefi ekzekutiv i organizatës, Tom Kiehl, e mirëpriti këtë zhvillim pozitiv, por theksoi nevojën për veprim institucional për të ruajtur stabilitetin e industrisë:

“Edhe pse kemi parë rritje të vazhdueshme, fitimet po bien krahasuar me vitet menjëherë pas pandemisë. Nëse sfidat strukturore nuk adresohen, qëndrueshmëria e sektorit në të ardhmen mund të vihet në rrezik.”

Aktualisht, 30-vjeçarja Dua Lipa ndodhet në Argjentinë si pjesë e turneut të saj botëror. Ajo u pa së fundmi në një ndeshje të ekipit të famshëm “River Plate” kundër rivalëve të “Boca Juniors”, në Buenos Aires, ku publikoi edhe një foto me motrën e saj, Rinën Lipa, pas dy koncerteve të suksesshme në këtë qytet.