Duka zv.president i UEFA-s, vlerësim për futbollin shqiptar

Presidenti i Federatës Shqiptare të Futbollit, Armend Duka, e ka quajtur “vlerësim të madh për futbollin shqiptar” zgjedhjen e tij si zëvendëspresident i shtëpisë më të madhe të futbollit, UEFA.

Ai ka theksuar se ky është vlerësim i madh që i bëhet punës së madhe që është bërë në këto vite, transmeton albinfo.ch.

“Komuniteti i futbollit shqiptar sot ka një vend në drejtimin e futbollit evropian dhe së bashku do të japim kontributin tonë për mbarëvajtjen dhe strategjitë zhvillimore të futbollit në të gjithë Evropën”, ka thënë Duka.

“26 shtatori 2023 do të mbetet një datë historike për futbollin shqiptar dhe jo vetëm sepse familja e madhe e futbollit evropian, UEFA, na besoi organizimin e Kampionatit Evropian për 17-vjeçarët në vitin 2025-të”, shkroi Duka.

Tutje, ai theksoi se përpara kanë shumë punë për të bërë në mënyrë që të mirëpresin kompeticionin e Kampionatit Evropian për 17-vjeçarët.

“Na presin sfida të rëndësishme, por së bashku me Qeverinë shqiptare, Ministrinë e Arsimit dhe Sportit, bashkitë e qyteteve që do të mirëpresin këtë kompeticion, do të arrijmë të bëjmë një organizim të shkëlqyer që do të nderojë Shqipërinë dhe futbollin tonë”, ka thënë Duka./Albinfo.ch