Dy të burgosur i vënë zjarrin burgut të Gjenevës

Rreth 200 të burgosur të burgut Champ-Dollon është dashur të evakuoheshin përkohësisht në një sektor tjetër

Dy të burgosur në burgun Champ-Dollon të Gjenevës i kanë vënë zjarrin qelisë së tyre, me ç`rast kanë pësuar djegie të rëndë. Si pasojë e vënies së zjarrit, rreth 200 të burgosur është dashur të evakuoheshin përkohësisht në një sektor tjetër.

Burgu Champ-Dollon, ndër më të mëdhenjtë në Zvicër prej kohësh është bërë i njohur me mungesën kronike të hapësirave. Ndonëse burgu zyrtarisht ka vend për 370 të burgosur, në fillim të janarit aty ishin vendosur dy herë më shumë se kaq. Mungesa e hapësirës shkakton edhe tensione në mes të të burgosurve dhe personelit.

Shpresohet se me zgjerimin e ndërtesave të këtij burgu, që pritet të bëhet së shpejti do të krijohet më shumë hapësirë jetese dhe do të ulen tensionet.